Талас тынысы Талас аудандық газетінің веб порталы
Related Articles
Ернар Әбдіразақ, «Talas tynysy».
Апта басында ауданға жұмыс сапарымен Қазақстан Республикасы Парламенті Мәжілісінің депутаты Мұқаш Ескендіров келіп, бірқатар әлеуметтік маңызы бар нысандарды аралап, аудан азаматтарын жеке және қоғамдық мәселелер бойынша қабылдады.
Мұқаш Зұлқарнайұлы алдымен «Қазфосфат» ЖШС «Шолақтау» тау-кен өңдеу кешенінде болып, еңбек ұжымымен жүздесті. Мәжіліс депутаты өз сөзінде парламентте атқарылып жатқан жұмыстар мен заңдағы өзгерістер, жаңашылдықтар жайында баяндай келе:
- Талас ауданына іс-сапар жасаудағы басты мақсат – аудан халқының тыныс-тіршілігімен танысып, мұң-мұқтажын тыңдау. Түйінді мәселелерді республикалық деңгейде қозғап, оң шешімін табуға атсалысу. Сондықтан көкейлеріңізде жүрген сауалдар мен талап-тілектеріңіз болса, ашық әңгімелесуге шақырамын, — деді.
Кездесу барысында кәсіпорын жұмысшылары мәжіліс депутатына көкейкесті сауалдарын қойып, ұсыныс — тілектерін жеткізді. Сондай-ақ, кәсіпорын басшысы Құдияр Омаров өндіріс ошағында атқарылып жатқан жұмыстар мен қызметкерлердің жалақылары, техникалық қауіпсіздік жайында баяндады.
Халық қалаулысы мұнан соң “Amanat” партиясының аудандық филиалы ғимаратында азаматтарға жеке қабылдау өткізді. Тұрғындардың талап — тілектерін мұқият тыңдап, көтерілген барлық сұрақтар тікелей назарында болатынын жеткізді.
Сонымен қатар, Мұқаш Зұлқарнайұлы Қаратау қаласындағы А.Байтұрсынұлы атындағы көшеде жүргізіліп жатқан жол жөндеу жұмыстарын бағамдады. Жауапты мамандарға жол сапасы мен мердігер компанияның жұмысы басты назарда болуын тапсырды. Сондай-ақ, аталмыш көше бойынан «Асарлатып үй салу» жобасы аясында баспаналы болған көпбалалы отбасын қоныстоймен құттықтап, шаңырақтарына береке тіледі.
Мұқаш Ескендіров жұмыс сапары барысында құрылыс жұмыстары басталған «Karatau Chemicals» пиросульфит өңдеу зауытын көрді. Халық қалаулысы құрылысы аяқталса 25,0 мың тонна пиросулфитнатрий өндіруге қуатты зауыт аудан экономикасының едәуір өсуіне себеп болатынын жеткізді.
Мұнан соң Мәжіліс депутаты Ақкөл, Қызыләуіт және Ақтөбе елді мекендеріне ішкі кварталдық газ тарту желісінің құрылыс жұмыстарымен танысты. Ауылдық округтердегі инфрақұрылымды дамытудың маңыздылығына тоқталып, жауапты бөлім басшыларына бірқатар тапсырмалар берді.
