Алғыс арқалаған абзал жандар

Мадина Жарас, «Talas tynysy».

Елімізде маусымның әр үшінші жексенбісі- медицина қызметкерлерінің күні. Осы атаулы күні адам жанының арашашысы, ақ халатты абзал жандарға арнайы құрмет көрсетіліп, еңбектері ерекше еленеді. Қашанда денсаулық күзетінде тұратын медицина қызметкерлерінің кәсіби мерекесіне орай өткен салта­натты жиында осы ақ халатты қауым құрметке бөленіп, мерейі тасыды.
Салтанатты шарада сөз алған аудан әкімі Қанатбек Мәдібек денсаулық сақтау саласы қызметкерлерінің еңбегін ерекше атап өтті.

• Бүгінгі таңда біздің еліміз көлемді реформалар жүргізуде, соның ішінде, ден­саулық сақтау жүйесін жетілдіру де маңызды істердің қатарында. Мем­лекет басшысы отандық медицина алдына үлкен әрі жауап­ты міндеттер қойып отыр. Ауданның денсау­лық сақтау саласында материалдық база­ны нығайту жұмыстары жалғасын табуда.
  Осындай мерекелік күнде барлық дә­рігерлеріміз бен мейірбикелерге, техни­калық персоналға, денсаулық сақтау ардагерлеріне аудан халқының атынан ризашылығымды білдіргім келеді.
  Құрметті медицина саласының қызмет­керлері! Ауыр да жанкешті, мәртебелі жұмыста толайым табыстарға жете бе­ріңіздер, — деген Қанатбек Қайшыбекұлы мұнан соң «Талас ауданына сіңірген еңбегі үшін» белгісімен, аудан әкімінің Құрмет грамотасымен, Алғыс хатымен бірқатар сала қызметкерлерін марапаттады.
  Аудандық орталық аурухананың бас дәрігері Есмахан Имаммырзаев сала ардагерлеріне бағалы сыйлықтар табыстады.
  Салтанатты жиын соңы мерекелік концерттік бағдарламаға ұласты.